MADC CEM thar N Zakhai la lut

Mara Autonomous District Council (MADC) inthlan zawh taka hnehna changtu, Congress party-in chief executive member (CEM) atana an thlan, N Zakhai chu nimin khan CEM turin rinawmna thu tiamtira lak luh a ni.

Lak luhna inkhawm hi chhun dar 12-ah MADC Complex-ah neih a ni a, Amobyu bial aṭanga thlan tlin N Zakhai chu CEM atan Siaha DC Harleen Kaur-i'n rinawmna thu a tiamtir. Inkhawm hi MADC executive secre­tary V Zacho-a'n a kaihruai.

CEM thar N Zakhai chuan a thawhpui tur exe­cutive member (EM) paruk hming a puang nghal a; chungte chu - K Hrahmo, MH Tiabi, K Chhuabei, FC Lawmkima, KH Beihlo leh VVB Byhna te an ni. Heti hian MADC-ah hian EM post pahnih a la ruak. EM atana ruat thar parukte hi MADC sorkar term liam taa EM ni tawh vek an ni.

CEM N Zakhai chuan, Mara mipuiin Cong­­ress party-ah rinna nghata MADC sorkar 11-naah rorelna tura an thlan tlin leh avangin lawm­thu a sawi a; "Kan party manifesto tih­hlawhtlin ngei kan tum a, chumi atan chuan Mara mipuite ṭawiawmna leh finchhuahna kan mamawh reng dawn a ni," a ti.

Siaha DC Harleen Kaur chuan, MADC inthlan buaipuitute zawng zawng chungah lawmthu a sawi a, sorkar thar chu duhsakna a hlan.

May 10, 2017 khan MADC inthlannaa MDC atana thlan tlin thar mi 25-te chu MADC pisa tualah rinawmna thu tiamtira lak luh an lo ni tawh a; MADC District Court president Jeff M Sanga'n rinawmna thu a tiamtir.

MDC lak luhna in­khawmah Siaha DC Harleen Kaur, ECM exe­cutive secretary Rev. Dr Lai U Fachhai leh Siaha Fast Track Court judge Dr HTC Lalrinchhana-te pawh an tel a; Evangelical Church of Maraland moderator Rev. Theilua Hlychho-a'n hun serh a hmang a ni.