KHAWTHLIR

Thla khatah ni tin Kudam hawn tur
Supply department chuan thuchhuah siamin, National Food Security Act hman a nih tawh avangin FCSCA department hnuaia fair price shop dealer/retailer zawng zawngin thla pumpuiin an kudam/dawr an hawng tur a nih thu a tarlang. Hei hi mipuiin an remchan huna buhfai an lak theihna atana tih a ni a; kudamte chu Pathianni tih lohah chuan ni tin zing dar 6:30 - 8:30 inkar leh tlai dar 3:30 - 5:30 inkarah hawn ngei tur a ni.

MJA-in lawmpui
Mizoram Journalist Association general headquarters chuan nimin khan Aizawl Press Club-ah an member, Lalhruaitluanga Chawngte-in Book of the Year 2016 a dawn lawmpuina hun an hmang. Lalhruaitluanga Chawngte lehkhabu ziah, 'Aizawlah Aizawler' tih chu nikuma lehkhabu chhuak zinga ṭha berah thlan a ni a; MJA hian lawmpui nan thuchei leh Rs. 10,000 an hlan a ni.

Chhunzawm phal
Serchhipa Sports Stadium sak mek, a sak dan tur duan lâwk ang ni loa sak nia hriat vanga YMA sub-hqrs., Serchhip-in May 1, 2017 aṭanga hna thawktute an chawlhtir chu May 10 aṭanga hna thawh chhunzawm an phalsak. Serchhip YMA chuan, stadium sak hna thawh dan chu an enfiah zui zel dawn thu an puang.

Kal theih loh
Bilkhawthlira PWD SDO chuan thuchhuah siamin, Bilkhawthlir leh Saphai inkara thing lei (bridge) pathum chu lirthei khalhtute tan him lehzuala siam ṭhat a nih dawn avangin, May 15-21 chhung he lai kawngah hian lirthei kal theih a nih dawn loh thu a tarlang.