Mizoram leh Myanmar ramri hnaiha Pawi khawihna do dan tur sawiho a ni

Central YMA, Tuipuiral Group YMA leh Myanmar-a pawl hrang hrangte chuan Farkawn leh a chhehvel khaw hrang hrang rama pawi khawihna leh thil ṭha lo do tura ṭan lakho an rel.

Pawi khawihna do chungchangah hian May 10, 2017 khan Myanmar ramria hmun pakhatah Central YMA, Tuipuiral Group YMA leh Myanmar-a pawl hrang hrang hruaitute an inhmu khawm a; Central YMA aṭangin general secretary Lalhmachhuana leh CEC member pathum an tel.

CYMA General Secretary chuan, Mizoram leh Myanmara Zo hnathlakte chu thisen inzawm, unau vek an nih thu sawiin, "Inṭanpui tawn tur ka ni a, harsatna leh manganna in tawh chángin min rawn pùr ṭhin u la, keini pawhin kan theih ang tâwkin puih che u kan tum ang," a ti.

Lalhmachhuana chuan, ruihhlo do kawng­ah ṭhahnem ngai taka thawhho leh invenpui tawn a ngaih thu te, Ṭiau luia nungchate humhalh kawngah ṭang tlan a ngaih thu te, pawi khawih ṭhinte leh kawhmawh bàwlte dîm loa do tlan a ngaih thute a sawi bawk.

CNA hotutpa Biaklinga pawhin thu a sawi a, Myanmar leh India rama Zo hnathlakte chu ram hranah awm mah se, unau nihna a danglam lo a, hrang thei an ni lo tih sawiin, "Burma hi democracy kan la hmang thiam lo a, India ram chu Mother of Democracy in ni a, min zirtir ṭhin a ngai a ni," a ti.

Biaklinga chuan, CNA-te hi hmun hrang hrangah ramri bul hnaiahte an awm tih sawiin, YMA-te chu theihnghilh lo turin a chah a, "YMA hian kan naute hi min enkawlsaka min ṭanpui kan ngai a, kan duh. Thawhhona kawngah, misual chu misual hrem angin hrem ngam ila kan duh a, mi ṭha pangngai misual sawngbawla sawngbawl an nih loh nan fimkhur taka hmalak ni se,"a ti a; harsatna a awm pawhin, tharum thawh lo zawnga dawhkâna sawiho zel ni se a duh thu a sawi bawk.

Inhmuhkhawmnaah hian ramri kâna ruihhlo leh thil ṭha lo dang tawlhrûk a awm lohna tur te, bike leh thil dang rûk a awm lohna tur te, pawi khawihna chi hrang hrang do dan tur te, Ṭiau luia nungcha leh lui kam ramngawa ramsate humhalh dan turte an ruahman a; tih tur leh tih loh tur hrang hrang an duante chu June 1, 2017-a hman ṭan turin an dah.

Joint meeting-ah hian YMA sub-headquarters Champhai aṭangin Lalchhuanawma leh Lalduhawma te pawh an tel a; Tuipuiral group YMA president H Lalliana'n a kaihruai a ni.