MZP-in HSLC top 10-te chawimawi

MZP chuan nimin khan Lal Thanhawla Auditorium-ah kumin HSLC-a top 10-a lang Mizo zirlaite chawimawina hun an hmang a; khuallian chief minister Lal Thanhawla'n zirlaite hnenah chawimawina thilpek a hlan.

Chief Minister chuan, kumin HSLC-a zirlai ti ṭhate chu an hlawhtlinnaah a lawmpui tih sawiin, tum mumal tak neia lehkha zir zel turin a chah a, "A bul ṭan ṭhat hi a chanve zo ang tia sawi hi hlawhtlinna kawng pawimawh tak a ni a, a bul ṭan ṭha turin a tìr aṭangin taimakna, tumruhna leh teirei peihnate kan neih a ngai," a ti.

Tunlai khawvel thiam­na chi hrang hrangte chu hmang thiam a, a ṭangkai zawnga hmang tura zirlai chahin Lal Thanhawla chuan, "Thiamnate hi a ṭha lo leh hlauhawm zawnga hman theih a ni a, thiamnate hi kan ṭangkaipui thei tih kan ngaihtuah a ngai," a ti a; thiamnate hmang ṭangkai zawnga ṭan la turin a chah.

Lal Thanhawla chuan, sorkarin zirna ṭha leh ram páwna thawn chhuah tlak zirna siam a tum tih sawiin, "Mizoramah hna petu lian ber chu sorkar a ni a, sorkar hnaah kan leng vek dawn lo. Chuvangin, ram páwna thawk turin rilru inpuahchah a ngai a, ram páwna thawk tlak ni turin zir a ngai a ni," a ti a; zirlaite chu ruihlo leh thil ṭha lo laka fihlim tur leh mahni inveng turin a chah bawk.

MZP hian kum 1995 aṭangin HSLC top 10-a lang Mizo zirlaite chawimawina hun an hmang ṭhin a; kum­inah hian HSLC top 10-a lang mi 17 zinga Mizo 13 hnenah chawimawina thuchei, pawisa leh thil dangte an hlan. Inkhawm­ah hian MZP president Lal­sangzuala Ngente pawhin thu a sawi a ni.