MBOCWWB-a thawk mi 36 bân an ni ; Thawktu mi 11 lak thar an ni dawn

Mizoram Building & Others Con­struction Workers Welfare Board (MBOCWWB)-a thawk mi 36-te chu May 8, 2018 khan bàn vek an ni a, dan angin thawktu tur mi 11 a thara lak a ni dawn.

Thu dawn danin, MBOCWWB hotute tun hnaia ṭhukhawm chuan MBOCWWB-a thawk mi 36-te chu dan ang ni loa lak an nih avangin bân an rawt a; rawtna chu Chief Minister-in a pawmpui hnuah mi 36-te bànna tura hriattirna chu May 8 khan tihchhuah a ni.

MBOCWWB pisaah hian thawktu awm thei zat bituk a awm lo a, mamawh dan anga lak theih a ni. Chutih rualin, scheme aṭanga ṭanpuina pek chhuah aṭanga 5% chauh pisa inrêlbàwlna atana hman theih a nih avangin thawktu tam tak a awm theih loh. Thawktu mi 11 lak thar tur chu thla hnih chhunga lak tura tih a ni.

Hetih lai hian, MBOCWWB-a thil dik lo awm nia sawi chhui tura Mizoram sorkarin Enquiry Commission a din chuan hna a thawk mek a, May 12, 2017 pawh Welfare Board-a thawkte thu a zawtfiah leh a, ṭum nga thu an zawhfiahna a ni.

Thu dawn danin, MBOCWWB chhui tur hian sorkarin Labour, Employment & Industrial Training (LEIT) secretary Benjamina leh IGP Niraj Thakur a ruat. MBOCWWB chhui tur ruatna hi April 20, 2017-ah tihchhuah a ni a, an chhuina report chu ruat an nih aṭanga thla khat chhunga thehlut tura tih an ni.

Enquiry Commission hi MBOCWWB kalphung leh sum hmanna hrang hrang chhui tura tih a ni a; MBOCWWB-a thawkte leh a kaihhnawiha mi eng emaw zat thu an zawtfiah tawha thu dawn a ni.

MBOCWWB hian December, 2016 thleng khan labour cess aṭangin cheng vbc. 46.41 an hmu tawh. Labour cess aṭanga sum hmuh dan chu kum 2011-2012 ah vbc. 1.61, 2012-2013 ah vbc. 7.07, 2013-2014 ah vbc. 7.17, 2014-2015 ah vbc. 8.47, 2015-2016 ah vbc. 10.50 leh 2016-2017 ah vbc. 11.57 a ni.