Eiruk sum kan mamawh lo - MNF

MNF chuan thu­chhuah siamin, MPCC president Lal Thanhawla leh a thurualpuite eiruk sum an party fund atan an mamawh loh thu an tarlang.

MNF chuan lottery sum bo chu MNF-in Chief Minister an puhna a nih loh thu tarlangin, "Mizoram sorkar docu­ment mai pawh ni lo, India sorkar document CAG Report-in chiang taka ziaka a dah fel thlap a ni a; CBI chhuitir ngai lo khawpa chiang a ni. Amah pawh hian a rukin a manganpui hle tih pawh MNF chuan a hria," an ti.

M/S Mizo Carbon Pvt. Ltd. hminga sorkar sum Rs 341,65,086 documents phuahchawp hmanga lak leh cheng nuai 1034 lak leh tum peihfel vek tawh chu Central YMA-in an chhui tak avangin an la ngam ta lo nia sawiin MNF chuan, "Pu Hawla'n Pu Rohluna a rawn ti pawh hi a ni lo, Pu Zodintluanga zawk a ni," an ti a, CBI chhuitir thu sawi fo chu Mizo mipuite bum tumna a nih thu an sawi.

MNF chuan heng Lal Thanhawla leh a thu­rualpuite eiruk sum chu an party fund-ah an mamawh loh thu tarlangin, "Pu Lal Thanhawla hian heng Mizoram mipui sum a eirukte hi Mizoram sorkar sum bawmah pe let vat rawh se tih hi kan ngaihdan a ni," a ti.

Zalenna suala kal chhuakte kha tu bum chhuah mah an ni lo tih tarlangin MNF chuan, "Anmahni duhthu ngeia ram leh hnam tana inpea zalenna suala chhuak an ni. Mizoram mipui, Kohhran leh party zawng zawngten inremna siama lokir tura kan ngen avanga lokir an ni zawk," an ti a, thu lawi lo sawifo chu zalenna sualtute hmuhsit vang a nih thu an sawi.