KHAWTHLIR

Pastor induction
Presbyterian Church of India, Mizoram Synod chuan, nimin Pathianni khan Mizoram chhunga hmun parukah pastor awm thar lak luhna, induction sevice an hmang a, Synod puipate'n an neihpui. Pastor induction service neihnate chu - Rawpuichhip bial, Keiṭum bial, Kelkang bial, Vanzau bial leh Tuidam bialte a ni.

ITI Vengin dem
ITI Veng local council leh NGO hrang hrangte chuan thuchhuah siamin, January 6, 2017 leh May 10, 2017 zana KVL Hruaitluanga motor bomb hmanga beih a ni chu an dem thu leh veng mipuite a tihralkhelh thu an tarlang a, "Bomb tipuaktu hi thuneitute'n a rang lama an man chhuah ngei leh pawi khawihtu hi dan anga hrem kan phut tlat a ni," an ti a, pawikhawihtu man chhuah kawngah police-te puih an inhuam thu an sawi.

Sikul hawng
Lawngtlai district-a Lungzarthum khuaa Rashtriya Madhyamik Shiksha Abhiyan sum hmanga secondary school building sak thar chu April 12 khan parliamentary secretary H Zothangliana'n a hawng. Sikul hi Rs. 48,56,000 senga sak a ni.

Tlan khap
Traffic SP C Lalthanmawia chuan thupek chhuahin, vawiin aṭanga May 17 thleng Sakawrtuichhun, Blessing Home peng aṭanga Lungverh main road inkalpawhnaah tui pipe phum hna thawh a nih dawn thu tarlangin, hnathawh hun chhung hian zan dar 7 aṭanga zing dar 5 inkarah lirthei tlan phal a nih dawn loh thu a tarlang.

Lusûn khawhar
K Lalchungnunga (63), Bawngkawn chu May 13, Inrinni chhun dar 1:30 khan cancer vangin Synod Hospital-ah a thi a, nimin khan vui a ni. K Lalchungnunga hi tun hma deuha lehkhabu lâr, 'Papillon' tih letlingtu a ni.