IWMP Champhai-I hnuaiah chhungkua 675 tuam

Integrated Watershed Ma­nag­ement Programme (IWMP) hnuaiah Champhai district chhungah ram hectare 4,421-a zauah hmalak mek a ni a, chhungkaw 675 tuam a ni tawh.

Champhai-I IWMP project hi kum 2009 -10 aṭanga kalpui a nih hnuah kalpui chhung zawngin cheng nuai 663.15 hmuh a ni a; project period chhunga IWMP hnuaia hma­lakna hrang hrang aṭanga February 2017 thlenga chhungkua a tuamte'n sum an thawh chhuah zat chu cheng nuai 305.09 a ni. Kum nga dang awm leh tur chhungin project kalpuina atana sum sen zat chu an hmuh chhuah hman beisei a nih thu, SWC officer Lalrinzama'n a sawi.

Sorkar thuchhuah chuan, Champhai-I IWMP-in a tuam chhungkua 675 zinga 284 chuan IWMP vangin eizawnna ngêlnghet zawk an neih phah a, tlangram lo neih (shifting cultivation) an bànsan phah niin a tarlang a; project hnuaiah self help group 20 din a nih thu a tarlang bawk.

Champhai district hi Mizorama IWMP kalpuina hmasa ber zinga mi niin, kum 2009-10 aṭanga kalpui a ni a, Champhai-I IWMP chu April 2017 khan a tawp avangin, IWMP implementing agency - Soil & Water Conservation department, Khawzawl chuan May 9, 2017 khan a tuam khaw pali - Kawlkulh, Dulte, Chhawrtui leh Puilo khuaa watershed society-te hnenah project a hlan a ni.

Project inhlannaah hian Champhai DRDA project director CC Lalchhuangkima chuan, project hnuaia hmalakna leh hnathawhte a hlawhtlin thu sawiin, project chu sorkarin a enkawlpui tawh loh hnuah pawh ṭha taka kalpui zel tur leh tizùzî lo turin IWMP beneficiary-te a chah.

CC Lalchhuangkima chuan, IWMP project-te chu kum nga chhung kalpui tur a ni tih sawiin, "Kum nga chhunga hna thawh zawh hman a nih loh chuan kum hnih dang pawhsei theih a ni," a ti a; Champhai-I IWMP hnuaiah kum sarih chhung kalpui a nih hnuah, sorkarin mahnia inenkawl thei tawh tura a ngaih avangin project chu society hnenah a hlan ta tih a sawi.

Champhai-I IWMP dinhmun tlangpui
Project-in a tuam zau zawng - Hectare 4,421
Project atana sum hmuh - Nuai 663.15
Project aṭanga thar chhuah tawh - Rs. 3,05,09,000
Tlangram lo neih bànsan zat - Chhungkua 284