Lungleiah bank dinhmun thlir lêt

Lunglei District Consultative Committee/District Level Review Committee/District Level Security Committee chu nimin khan additional DC R Vanrengpuia hoin DC conference hall-ah an ṭhu a, an district-a bank hrang hrang dinhmun leh hmalaknate an thlir lêt.

R Vanrengpuia chuan, bank-te chu ram hmasawnna hna thawktu pawimawh an nih thu sawiin, bank manager-te chu an bank hmalakna apiangah mipui hmasawnna leh hamṭhatna dah pawimawh hmasa ṭhin turin a chah a, "Kawng hrang hranga kan district tihmasawn turin bank leh line department ṭangkawpte'n theihtawp chhuaha hma an lâk a ṭul," a ti.

Meeting-a tarlan ṭhenkhat

    Covid-19 vangin women self helf group, World Vision leh MzSRLM-te hmalakna a chak lo. Financial year 2019-20 chhungin SHG 106 hnenah loan cheng nuai 98 pek a ni.

    Credit deposit ratio (bank-in deposit a dawn aṭanga loan a pek chhuah zat tehna) chu December 2019 quarter-ah 46.64% a ni a, March 2020 quarter-ah 53.22% a ni thung.

    Prime Ministers Employment Generation Programme-ah hmalakna a ṭha thawkhat a, financial year 2019-20 chhungin mi 275 hnenah bank hrang hrangin loan cheng nuai 583.96 an pe.

    Financial year 2019-20 chhungin mi 3,078 hnenah agriculture loan cheng nuai 2472.71 an pe chhuak.

    Financial year 2019-20 chhungin sumdawng mi 1,957 hnenah MSME loan (manufacturing leh services) cheng nuai 5866.23 an pe.