MBS-in hma lakpui turin CM an ngen

Mizoram Blind Society (MBS) chuan nimin khan Chief Minister hnenah memorandum an thehlut a; PWD-a thawk tur laknaah SA atan mitdelte hnawl tumna an duh loh thu tarlangin, dan anga a ṭul anga hma lakpui turin an ngen.

MBS tarlan danin, Mizoram PWD-ah rualbanlote tana a bika post 17 siam niin, chu'ngte chu SA-ah paruk leh grade IV-ah post 11 a ni a; April 4, 2017-ah chanchinbuah puanzar a ni. Hna chu mitdelte pawhin an dil ve a, mahse, PWD thuneitute chuan DPAR-in a tihchhuah Mizoram Gazette for Persons with Disabilities 2011 ṭan chhanin, mitdelte tan SA post chu dil theih loh an ti leh a, dilna pawh dawn an tum lo niin an tarlang.

Sorkar thil tih dan chu Persons with Disabilities Act, 1995 Section 33 leh Indian Constitution Article 14 leh 16(1) kalh a nih thu sawiin, MBS chuan, DPAR-in gazette a tihchhuah anga kal a nih chuan mitdel (totally blind)-te tan luh theih a ni dawn lo tih an sawi a, "DPAR-in rualbanlote hna lakna tur atana a tihchhuah hi relax turin Chief Minister kan ngen a ni," an ti.