Online Jump Rope Competition Buatsaih tum a ni - Robert Romawia

Union Sports minister Kiren Rijiju hoin nimin khan Sports Ministers Video Conference neih a ni a, Mizoram Sports & Youth Services minis­ter Robert Romawia Royte pawh telin, Online Jump Rope Competition buatsaih tum mek a nih thu a sawi.

Robert Romawia Royte chuan, Mizoram sorkar leh mipuiin infiamna leh ṭha-laite hmasawnna an ngaih pawimawh avangin Mizoram sorkarin Mizoram Sports Policy 2019 a duang tih a sawi a, "Sports hi industry din­hmunah hlángkaiin, Mizoram State Games pawh mumal taka kalpui ṭan a ni. Sorkar hna lak tur zawng zawnga 5% chu in­fiammite tan hauhsakna dan siam thar a ni," a ti.

Kiren Rijiju hmalaknaa Khe­lo India programme her rema siamṭhat mek a ni chu lawmawm a tih thu sawiin Ro­bert Romawia chuan, "Covid-19 donaah Mizorama NSS, NCC leh Bharat Scouts & Guide-te'n theihtawp an chhuah. Sorkar bakah YMA leh kohhrante'n nasa takin hma an la a ni," a ti a; Mizo nuna bet tlat - tlawmngaihna hlutzia a lan chhuah nasat thu a sawi.

SYS Minister chuan, Covid-19 avangin infiamna lama intihsiakna buatsaih theih a ni lo tih sawiin, "Chuti chung chuan Fit Mizoram hmalaknain Home Fitness Programme nung taka kalpui a ni a, mi tam tak chu an in chhungah an insawizawi a, Governor leh Chief Minister-te pawh mi dang tih­hmuhtu an ni. Online Jump Rope Competition buatsaih tuma hmalak leh mek a ni," a ti.