Lungleiah sa man bithliah thar
Lunglei DC V Lalsangliana hoin July 14, Thawhlehni khan DC Conference Hall-ah Lunglei khawpuia sa chi hrang hrang hralhna man tur sawiho a ni a, a man tur an bithliah nghal.
V Lalsangliana chuan, Lunglei khawpuia sa man inang lo thluah leh mi ṭhenkhatin sa bûk tling loa an hralh ṭhinin mipui tan harsatna tam tak a thlen thu a sawi a; sa chungchanga harsatna sutkian a nih theihna tur leh sa zuarte'n hloh nei chuang loa an sumdawnna tluang taka an kalpui theihna turin sa man mumal tak a awm a ṭul thu sawiin, sa man sang lutuk tur leh bûk tling lo veng tura thawhhopuiah sa zuarte leh pawl hrang hrang a sáwm a ni.
Lungleia sa man an bithliah dan chu - kg. khat zelah - vawk sa Rs. 400, ar sa puah loh Rs. 250 leh puah sa Rs. 350, sangha phai aṭanga lak luh Rs. 300 leh Mizorama dil sangha Rs. 350, bawng sa - a thin Rs. 550, a ti, ir, kawchhung Rs. 500, a ruh Rs. 350, a ti leh ruh sah pawlh Rs. 450 leh a chek khai khat Rs. 100 a ni.
Lunglei bawrhsap chuan, sa man bithliah thar chu zâwm vek tur leh bûk tling ngeia hralh turin ran talh leh sa zuarte a hriattir a; bûk tling loa sa leite chu sorkar thuneitute hnena hriattir turin a chah bawk.Sa man bithliahnaah hian Lunglei SP Stephen Lalrinawma, additional DC R Vanrengpuia leh sorkar official dang te, Lunglei District Consumer Association, YMA sub-headquarters, MJA leh Lunglei ran talh leh sa zuar pawl aiawhte an tel a ni.