Myanmar aṭanga dan loa bungrua Rawn lut tur lirthei neitute'n dang ; Zalên taka kuhva rah phurh theih an duh

Champhai District Lirthei Inzawmkhawm Pawl (CPDLIP) chuan nimin zing dar 6 aṭang khan Myanmar aṭanga dan loa Mizorama bungraw lut tur leh Champhai aṭanga chhuak turte tiamchin awm loin an dang ṭan.

CPDLIP hian Champhai kudam hrang hranga kuhva rah chhêk khâwl sate chu Vairengte thleng zalên taka a kal theihna turin sorkarin hma la se an duh.

CPDLIP hruaitute chuan, Myanmar aṭanga dan loa bungrua rawn lut zinga kuhva rah chauh tihtawp tum a ni chu inthleibikna leh Champhai district mipui rêp chàr tumna leh îtsîkna vang nia an ngaih thu an sawi a, "Mipui ni tin mamawhte pawh dan loa lut vek a nih avangin dan dik tak anga kal theih a nih lohzia hria a, kan harsatna tawh Mizoram mipuite'n min hriatthiampui kan beisei," an ti.

Ramri kâna insumdawn tawnna chu dan hnuaiah zalên takin kal se an duh ber tih sawiin CPDLIP hruaitute chuan, "Mumal zawka bungrua lak luh a nih theihna tura hma la kan ni,"an ti a; an hmalakna chu dan loa bungrua leh ruihhlo lâk luh dan kawngah police thâ tihchaknaaan ngaih thu an sawi.

CPDLIP hruaitute chuan, ruihhlo hluar zel tur vênna leh khualzinte zalen taka an kal theihna turin Mizoram police duty post an rin tâwk thu sawiin, "Assam Rifl es-in an duhna hmun hmuna duty post an siam hi mipui zalenna rahbehna, nêkchêpna leh palzûtnaah kan ngai. An duty-na hmun sorkarin sawn se kan duh," an ti.

CPDLIP chuan, Champhai district-a MLA pathumte chu ramria insumdawn tawnna avanga malsawmna an dawn ṭhina harsatna an tawhah mipuithlavâng hauh a, huaisen taka ding turin an phût a; international border trade zár an zo theihna turin Mizoram sorkar chu sorkar laipuiah an harsatna thlen a, a tih tur ti ve turin an phût bawk.