Rotary Club-in An din champha an lâwm

Rotary Club of Aizawl chuan nizan khan Aijal Club-ah Aizawla an din champha vawi 30-na pualin hun an hmang a, Home secretary H Lalengmawia khuallian niin, MJA General Headquarters president C Lalrambuatsaiha chu special invitee a ni.

MJA president C Lalrambuatsaiha chuan, mihringte chu in mamawh tawn, a huhoa khawsa tura Pathianin a siam an nih thu a sawi a, "Mi dang tel loin kan khawsa thei lo a, mahni chauhin kan khawsa thei lo. Mahni chauh inngaihtuah ṭhinte nun a hlim ngai lo a, mi dang tana inpe leh che nasa apiangte nun a hlim ṭhin," a ti.

C Lalrambuatsaiha chuan, "Malsawmna kan dawnte hi mi dangte tan kan pe chhuak ve tur a ni a, mi dang tana inphal apiangte an hlim ṭhin," a ti a; mi dangte tana inhman kawnga Rotary Club inpekna leh hmalaknate chu ropui a tih thu a sawi.

MJA President chuan, mi dangte tana malsawmna nihna kawngah Mizote an ṭhanharh tial tial thu sawiin, "Kan harh mek zel a, Covid-19 boruakah kan luang chhuak ṭhin a, Mizote kan thang mawi a, a lawmawm. Mi dangte ṭanpui hi a Pathian thu a, a Kristian a, a Mizo hle a ni," a ti.

Khawvel pum huapa pawl lian berte zinga mi Rotary Club hi June 13, 1992-ah din a ni a, Mizoram hmun hrang hrangah ṭanpuina tam tham tak an pe tawh a ni.