Wine zuartu thi ta zángnadawmna pek phûtin Congress ṭhalai an pungkhawm
Mizoram Pradesh Youth Congress Committee (MPYCC) chuan nimin khan Excise & Narco tics department (END)-in May 27, 2022-a Millennium Centre-a grape wine zawrh lai an man neitu zinga mi Lalhriatpuii, Dawrpui Vengthar, July 11, 2022-a thi ta chhungte hnenah zangna dawmnacheng nuai 100 pe tura sorkar phûtin Secretariat bulah an pungkhawm.
Sorkarin zangnadawmna a pek hma chuan hmalak zui zel an tum thu an sawi. MPYCC president Dr Lalmalsawma Nghaka chuan an pun khawmchhan sawiin, "Dik lo taka sorkarin, minister-in a puhna avanga rilru hrehawm lutuk kal zelah a taksain tuara a nunna thlengin a tawrh phah Pi Hriatpuii zahawmna humhim turin kan lo kal a ni. Politicise tum kan la a ni," a ti.
END Minister-in dan loa zu zuar nia a puh chu pawi an tih thu sawiin Lalmalsawma chuan, "Dan loa zu zuara puhtu hian ngaihdam a dil kan phût. Eng vangin nge Minister hian thu hrechiang loin journalistte a kawm tihte pawh ngaihtuah tham a ni a, vawiin thlengin thil nih dan dik tak an la puang duh lo," a ti a; diknain Mizoramah hmun a chan loh mek thu a sawi.
Dr Malsawma chuan, an thil phût chu sorkarin a tihhlawhtlin loh chuan a tàwp thleng kal an tum thu sawiin, "Kan hotute an pu ber mumang
ûmin mi pawi an sawi mawlh mawlh a, vawiinah hian stand kan neih loh chuan pu berin mumang a nei leh ang a, chutah chuan an nei amaw an ti ang a, pawisawi lo mipuiin kan tuar leh ang tih kan hlau," a ti.
MPCC general secretary K Lalnunmawia pawhin thu sawiin, "He thihna lungchhiatthlak tak thlenna bulpui ber chu sorkar mumal loh vanga ni a, grape wine zawrh leh khap dan tur pawh mipuiah tlangzarh awm loin ni khat thil thuah mi sumdawnna an tichhe vek a, vantlang hmaah
intihmualphona nasa tak a thleng bawk," a ti a; ENDin May 27, 2022-a an man list-a tel si loin zu zuar anga an puh thu a sawi.
Congress ṭhalaite chu thil phût pathum neiin an au rual a; sorkarin zangnadawmna a pek dawn leh dawn loh sawi chiang turin END Minister an phût a, a sawi chian hma chu ûm zui zel an tum thu an sawi a ni.