NHM-a thawkte sorkarin a vau ; Sorkarin hna zawm turin a hriattir

Mizoram sorkar chuan NHM Employees Union, Mizoram (NEUM) bultuma July 11, 2022 aṭanga chawlh la NHM hnuaia thawkte chu vawiin, July 14 aṭangin an hna chhunzawm turin a hriattir a; hna an zawm lo a nih chuan an chungah dan anga hmalak tum a nih thu a puang.

National Health Mission (NHM) mission director Dr Eric Zomawia chuan Health & Family Welfare department aṭanga thu a hmuh angin nimin khan thupek a tichhuak a; NHM hnuaia thawkte'n vawiin July 14-ah hna an zawm vek theih nan hma la tura controlling officer-te hriattirin, "Controlling officer zawng zawngte chuan anmahni CMO-te ṭheuh kaltlangin an zawm leh zawm loh rawn thlen ṭhin tur a ni," a ti.

HFW department chuan nimin khan NHM Mission Director hnenah lehkha a thawn a; NEUM-te thil nawr chungchangah sorkarin theihtawp a chhuah nia tarlangin, "An hlawh pawh April leh May pek tawh a ni a, June leh a hnu lam atan an hlawh tur pawh chak taka ngaihtuahsakniin, hotute'n thil awm dan vawi tam tak an hrilhfiah tawh," a ti a, chuti chunga an nuar chu sorkarin a hriatthiam tak zet tih a tarlang.

Damlote leh mipui tawrhna a zual zel loh nan NHM hnuaia thawktute chu July 14 aṭangin dan pangngaia an hna chhunzawm ṭheuh tura hriattir tura ngenin Health department chuan, "Hna zawm lo an awm a nih chuan an chungah sorkarin dan angin hma a la ang," a ti bawk.