Sorkarna siam turin kan inpeih tawh - Lalduhoma

ZPM leader Lalduhoma chuan, Pathian leh mipui zarah sorkarna siam turin ZPM party an inpeih tawh hle tih a sawi.

Lalduhoma hian Champhai leh a chhehvel khua a fang mek a, July 12, Thawhlehni leh nimin khan Tuipui, Ruantlang leh Zotlangahte vantlanginkhawmah thu a sawi a; ZPM hun a inher chhuak mek nia a lan thu sawiin, "Kan mithiam rualte nen ruahmanna siamin, Pathian leh mipuite zarah sorkarna siam tur hian kan inpeih tawh hle a ni,” a ti.

ZPM Leader chuan, "Kan ram kan hnam damna tak tak chu Pathianah a awm a, leilung leh a chhunga awm zawng zawng hi Pathian siam leh a ta an ni a, a enkawltu turte pawh keini mihringte kan ni," a ti a; Pathian thil tum chu khawvela a ram din a nih thu leh leiah Pathian ram din phawt a ngaih thu a sawi.

Pathianin amah ringtute chu leilungah hrisel taka awm turin a hrilh tih sawiin Lalduhoma chuan, "Tunah kan ramah natna chi hrang hrang vei kan tamzia ngaihtuah hian tih dik loh kan nei a ni tih hi i hre tlang ang u. Kan eizawn danahte hian bûkna dik lo kan hmang nasa tawh em em a, dam rei ngaihna a awm lo. Kan ram siamṭha tur hian kan zavaiin mawh kan phur a, páwn aṭanga ram vei mai loin, a chhungah kan luhchilh a ngai a ni,” a ti.