Riverine Reserved Forest-a rìn luh Duh lohna Tlabung mipuiin an lantir

Tlabung khuaa VC leh pawl hrang hrang intel khawmna, Tlabung Joint Action Committee huaihawtin nimin khan Riverine Reserved Forest huam chhunga Tlabung rìn luh nih duh lohna mipuiin an lantir a; RRF huam china Tlabung khua bik chu RRF aṭanga hlih an phût.

Tlabung JAC chairman P Vanlalmawia chuan, Tlabung khua chu Mizoramah kum 1965-a Riverine Reserved Forest (RRF) puan a nih hma daih, kum 1871-a din tawh a ni tih sawiin, RRF avanga harsatna hrang hrang an tâwk chu an hrethiam lo tak zet tih a sawi. P Vanlalmawia chuan, RRF chu dodalna an nei lo tih sawiin, "Kum 100 chuang fé kan lo chên tawhna leh chhiah kan lo pek phah tawhna kan ramah neitu nihna chhuhsak kan ni hi kan pawm dam thei lo a ni," a ti.

Tlabung JAC huaihawta nimina mipui punkhawmnaah RRF area-a rìn luh an nih avangin ram neitu hming an thlak theih tawh loh thu te, pass ṭhenkhat tihnun leh thlengin harsatna an tawh thute an sawi a; an dikna leh chanvo humhalh turin lungrual taka ke pên zel an rél a, resolution an siam bawk.