Lawngtlai hmasawn dan tur sawiho

Lawngtlai district bawrhsap Amol Srivastava hoin nimin khan DC conference hall-ah sorkar leh páwl aiawhte'n Lawngtlai khawpui faina leh thianghlimna kawnga hmalakna tur te, leilung leh boruak humhalhnaa hmalak dan turte an sawiho.

District Sanitation Task Force, District Committee on Elimination of Single Use Plastics (SUPs), District Water & Sanitation Committee, District Monitoring Committee on Compliance of Environmental Laws leh District Bio-Medical Waste Management Committee hnuaia hmalakna turte sawiho a ni a; Lawngtlai khawpuia veng tinah faina lama hma latu tur village cleanliness committee din vek ni se, an ti.

PHE department hnuaia bawlhhlawh sawngbawlna - solid waste management centre siam tur chungchang te, hman khat daih sarâng (singleuse plastic) hman khapna a hlawhtlin theih nana hmalakna tur te, sorkar sikula faina inzirtirna kalpui te, hman khat daih sarâng chi hrang hrang hman chhunzawm a nih loh nan a zuartute leh sumdawngte nen thawkhoa hmalak dan turte sawiho a ni bawk.