Bhanu Acharya pian champha lawm

Gorkha-te tana ziak leh chhiar bakah, hnam hmasawnna tura thawh hlâwk tak, Adi Kavi Bhanu Bhakta Acharya pian champha vawi 208-na chu nimin khan Mizoram Gorkha Youth Association (MGYA) huaihawtin Vanapa Hall-ah lawm a ni a, Governor Hari Babu Kambhampati-a'n a hmanpui.

Governor chuan, Bhanu Bhakta Acharya sûlhnute leh hnathawhte chu Gorkha-te tan a hlu hle tih sawiin, Sanskrit aṭanga Nepali ṭawnga Ramayana a lehlin aṭangin Nepali ṭawngin nasa takin hma a sawn tih a sawi a, "Tunah chuan Nepali ṭawng chu India danpuia 8th Scheduled-ah telh a ni tawh a, hei hian hlâwkna tam tak a keng tel a ni," a ti.

Gorkha-te chu khawvel ram hrang hrangah awm darh mahse an awmna hmun apiangah mi dangte nen inrem takin an chengho thei zel chu ropui a tih thu sawiin Larsap chuan, "Mizoramah pawh Gorkha-te chu rei tak an lo awm tawh a, Mizote nen inngeih takin tun thlengin an chengho zel a ni," a ti a; Mizote nena an inunauna leh inremna chu chhawm nung zel tur leh vantlang tana thil ṭha tih kawngah theihtawp chhuah zel turin a fuih.

Governor chuan, Mizoramah Gorkha mi 20,000 vel an awm thu sawiin, hnam tlem zawk an nih avanga harsatna an neih leh siam rem ngaite chu sorkar thuneitute sawipui a tum thu a sawi a; Gorkhate chu hnam huaisen, rinawm leh rálvengtu atana khawvel puma rinkai an nih thu a sawi bawk.

Adikavi Bhanubhakta Acharya hi Nepal ram Tanahu district-a Chundi Ramgha khuaah kum 1814 khan a piang a; thu leh hla lamah sûlhnu tam tak neiin, khawvelin a hriat làrna ber chu Hindu sakhaw lehkhabu Ramayana, Sanskrit ṭawng aṭanga Nepali-a a lehlinah a ni.