MNYF-in MPYCC chêt dan mak an ti

MNF ṭhalaite chuan, Lalhriatpuii (L), Dawrpui Vengthar chhungte hnena zangnadawmna cheng nuai 100 leh grape wine man tawhte pek lêt an phût chu mak an tih thu leh Excise & Narcotics department (END) leh a enkawltu minister Dr K Beichhua te an thlàwp tlat thu an tarlang.

MNYF chuan, Congress sorkar laiin zu zawrh a ni tih sawiin, "Mipui manganna hriain MNF party chuan sorkarna a chan veleh zu zawrh khapna dan MLP Act, 2019 siamin, he dan hian grape wine pawh huam telin zawrh khap a ni," an ti a; MLP Act kenkawhnaa mawhphurtu END-in theihtawp an chhuah tih sawiin END leh END Minister-te chu an chhuang a, an thláwp tlat tih an sawi.

May 27, 2022-a grape wine man neitu zinga Lalhriatpuii, Dawrpui Vengthar, July 11-a a thi chu pawi an tih thu sawiin MNYF chuan, a kalsan a chhungte an tawrhpui thu an sawi a, "MPYCC-te'n MLP Act 2019-in a khap grape wine man leh he thihna hi sawi zawm tuma politics-a hamṭhatna lâk tum ni àwm taka zangnadawmna cheng nuai 100 leh grape wine man sa pek lêt an phût hi a mak kan ti a, àwm ang lo kan ti hle," an ti.

MNF ṭhalaite chuan, grape wine man leh Lalhriatpuii thihna chu a inzawm a ni tih medical proof an neih leh neih loh Congress ṭhalaite an zawt a; "Congress sorkar chhunga an zu zawrh in avanga thite avang khan hmeithai naupang tê tê leh fahrah tam tak awm phahte hnenah khan zangnadawmna pek an tum em?" an ti bawk.