KHAWTHLIR
Career guidance
Mamit District Child Protection Unit (DCPU) leh MZP headquarters, Mamit chuan nimin khan IPR Conference Hall-ah HSLC pass tharte lawmpuina leh Career Guidance Awareness Campaign an buatsaih a; Mamit DC Lalbiaksangi'n a hmanpui. Mamit DC chuan, zirlaite chu tum mumal tak nei tur leh an tumte hlen tura taima leh chhel taka zir turin a fuih a; Mamit district-a pawl 8-12 zirlaite tan India Air Force-a luh theihna turin IAF lam hotute nen hun la hmanho tur a nih thu a sawi.
Sapthei lei zat
MIFCO chuan Kum 2016-2017 (March 17 thleng) khan sapthei quintal 1736.79 an lei. Saptheite hi a tui sawrin, Mizoram chhung leh pawnah an hralh a, sapthei tui litre khat Rs. 130-150 leh squash bur khat Rs. 70-in an hralh ṭhin a ni.
Têkin in a déng
Nimin zing dar 6:30 vela ruahsûr laiin Vaivakawna Sevenday Tlanga Remsangpuia in, Assam type chu ṭêkin a dêng a, in bang a den chhiat bakah, in chhunga bungraw eng emaw zat a kâng chhia. Thu dawn danin, Remsangpuia te chhungkua hi dam lohna thil avangin Pathianni zan khan Bethlehem Vengah an riak a, an in hnuai luahtute pawh an zinbo lai a ni.
MST bus
Transport department chuan thuchhuah siamin, mipuite'n indaih zawka bus an hman theihna atan May 22 aṭangin MST bus Khawlian leh Aizawl inkar service chu chu Thawhṭanni apiangin zing dar 6-ah Aizawl aṭangin a chhuak ang a, Thawhlehni apiangin zing dar 8-ah Khawlian aṭangin a chhuak ṭhin ang.
Champhai thing phun
Champhai District Forest Division hnuaiah kum 2012 aṭanga 2016 thleng khan thing ṭiak 68,193 phun a ni tawh a, thing ṭiakte chu Green Mizoram Day-a phun a ni tlangpui. Thing phunte ngaihven tur bik nikum aṭangin ruat a ni.