Hnam sipaite bum chhuah an ni lo - Zorama

MNF president Zoramthanga chuan, Chief Minister tan thu puitling deuh sawi ṭha a tih thu leh, MNF-in independence an puana hnam sipaite chu bum chhuah an nih loh thu a sawi.

Nimina Thingsul­thliaha Ṭawi West Block MNF-in SEDP training an buatsaihah Zoramthanga chuan May 12, 2017-a Congress Bhavan-a CM Lal Thanhawla'n 'MNF ramhnuai mite hi an hotute'n an bum chhuak a, an bum lut leh a ni,' tia a sawi a chháng a, "CM meuh hi chuan thu puitling deuh sawi a ṭha. Kum 1966-a Mizo hnam movement rawn zawmtu Mizo tlangvalte kha bum chhuah an ni lo," a ti.

Zoramthanga chuan, kum 1966-a Mizoram independence an puan tirh lamah Lal Thanhawla pawh MNF headquarters-a secretary zinga pakhat a nih thu sawiin, "Bum chhuah anga sawi a nih dawn chuan amah ngei pawh a bul tumtute zinga mi a ni tihna a ni," a ti a; MNF movement zawm­tute chu bum an ni lo a, Mizoram leh hnamin chhan a ngaih vanga martar leh nunna hlan huama anmahni thua chhuak vek an nih thu a sawi.

MNF President chuan, Mizoram mipui, political party, kohhrante leh tlawmngai pawl zawng zawngin inbiakremna zawng tura an ngen avang­in, harsatna tinreng karah inbiakna neih a ni tih a sawi a, "A tawpah mipui­te ṭawngṭaina chhángin Pathianin inremna ropui tak min pe a, chu inremna chu ṭha tiin Pu Hawla te party sorkar aiawh leh MNF President ten hming an ziak a ni," a ti.