Mikhual chhinchhiahna bu sem

Nimin khan Kolasib DC Dr H Lalthlangliana hoin Zonal Exe­cutive Magistrate, Border Safety Monitoring Team leh Kolasib district-a task force hruaitute an ṭhukhawm a, ‘State dang mi chhawr laite’ tih leh ‘Mikhual chhinchhiahna’ tih chu sem a ni.

Dr H Lalthlangliana chuan, Kolasib district chu ramri thui tak nei a nih thu sawiin, "Ram páwn mi hna thawka chhawrte leh mikhualin an paltlang reng a nih avangin chhinchhiahna bu felfai tak siam a pawimawh. Heng chhinchhiahna bute hi hri kai awm palha inchhui lêtna tur hmanraw ṭangkai tak a ni ang," a ti.

Meeting-ah hian, ramri kâna ni tin mamawh leh bungraw phur lirthei khalhtute swab sample endik a nih ṭhin thu te, tangkhang leh ṭul dang vanga state páwn aṭanga lirtheia lo lut ṭhinte chuanna chhinchhiah a nih tur thute leh, a ṭul zuala hman theih turin Saiphai leh Phaisen kawng pawh hawn theih tur a ruahman ni se, tihte sawiho a ni.