MPF leh politcal party hruaitute'n Thawhhona thuthlung an thlirho House to house campaign phal a ni dawn

Mizoram People Forum (MPF) leh political party hruaitute chuan, nimin khan Synod Committee Room-ah MPF-in thawhhona thuthlung tur an duan an thlirho a; ruahmanna ṭhenkhat siam ṭhat a ni a, house to house campaign phal a ni dawn.

Inkawmhona hi MPF president Rev. Lalzuithanga'n a kaihruai a; political party hrang hrang - Congress, MNF, MPC, ZNP leh BJP aiawhte an tel.

MPF-in thawhhona thuthlung tur a duan hi thupui pariat - inthlan, inthlan senso, inthlan campaign, zalen taka inthlan leh venhimna, policy siam, candidate, thawhhona leh tlangkawmna tia ṭhen a ni.

Thupui tinah hian point hrang hrang a awm leh a, kum 2013-a Assembly inthlan dawna thawhhona thuthlunga awm ngai lote telh a nih bakah, point ṭhenkhat chu siamṭhat a ni.

MPF chuan, thawhhona thuthlung turah hian, 'House to house campaign hi thil dik lo tam tak inphùm rûk theihna leh senso titamtu a nih avangin tih hauh loh tur,' tih an telh a, hei hi political party-te chuan paih an duh.

Political party aiawhte chuan, house to house-ah sum sem a nih ngai loh thu te, candidate lâr lote tan house to house campaign khap a nih chuan chance a chhiat thute leh MLA dinglai tan chance a ṭhat thute an sawi.

MPF hruaitute leh political party aiawhte'n an ngaihdante an sawi hnuah house to house campaign chu khap lo tura thutlukna siam a ni a, 'House to house campaign hi MPF local forum-te nen phal a ni ang,' tih a ni.

'Vote thlak tura khawpui aṭanga anmahni khaw lama hawna tur bus leh lirthei dang tumsak te, kalna leh hawna tur sum pekte hi tumahin tih loh ni se,' tih pawh political party aiawhte chuan an duh lo.

Sawiho a nih hnuah MPF ruahmanna siam sa chu tidanglam chuang loin, 'Hetiang thilah hian local, constituency leh district level MPF-te'n nasa lehzualin mipui zirtir se. Hetiang bawhchhia leh tilui an awm chuan sorkar dan dinglai anga thla thum jail tàn theih a ni,' tih ziah belh a ni.

Ruahmanna thar ang chuan, MPF-te'n candidate-te tan joint platform an buatsaih tawh dawn lo a, ṭul bik thilah erawh an buatsaih tho ang. Political party-te chu public meeting neih an duh chuan MPF kaihhruaina hnuaiah neih tur a ni a, state pâwn lam aṭanga campaign tur lo kalte pawhin public meeting an kohin MPF-in an kaihruai ang.

MPF chairman Rev. Lalzuithanga hnen aṭanga thu dawn danin, nimin meeting tihdanglamte hi June 13, 2017 khian MPF leh political party-te'n an thlirho leh dawn a; an pawm tlàn chuan politcal party president-te'n hming an ziah hnan turin an pisaah ken kual a ni ang.

MPF leh party-te thawhhona thuthlung ṭhenkhat
n Inthlanna thianghlim, dik leh felfai tak a awm ngei theihna turin mi tinin theihtawp chhuah
ṭheuh ni se.
n Inthlanah hian khua leh tui dik tak vote neite chuan vote thlak ṭheuh ni se.
n Vote thlak tur khawpui aṭanga anmahni khaw lama an hawna tur bus leh lirthei dang hire sak te, kalna leh hawnna tur sum pekte hi tumahin tih loh ni se. Hetiang thilah hian local, constituency leh district level MPF-te'n nasa lehzualin mipui zirtir se. Bawhchhia leh tilui an awm chuan sorkar dan ding lai anga thla thum jail tàn theih a ni.
n Election Commission of India (ECI)-in MLA candidate pakhat tan inthlan senso atan cheng nuai 20 aia tam hman a phal lo a, ECI phal bak hman a nih lohna turin ṭan lak ṭheuh ni se.
n MPF-te'n candidate leh party-te hnenah pawisa dil emaw, dawn emaw khap tlat a ni.
n House to house campaign chu MPF local forum-te nen phal a ni ang.
n Sum leh therhlo dang hmanga vote lei leh hralh tih loh nise. Mipui, pawl hrang hrang leh kohhrante pawhin candidate-te hnenah thil phût neih tur a ni lo.
n Mipui vantlang tana ruaiṭheh leh picnic hi a hautak em avangin tih hauh loh tur a ni.
n Candidate-te rulh tura dawr leh hmun danga thil lo lak leh pûkte pawh tih hauh loh tur a ni.
n Candidate-te tana inthlan tihautaktu - banner, flag leh poster-te hi veng tina tàr zat tur bithliah a ni.
n Sorkar dan ding lai angin, naupang kum 14 chin leh a hnuai lamte chu inthlan kaihhnawih thilah hman phal an ni lo.
n Public Information Office neih loh tur a ni a, MPF information aṭangin party thil ṭulte chu puan ṭhin a ni ang.
n Social media hmanga dik lo taka thu thehdarh hi sorkar dahin a phal loh avang leh a thehdarhtute chu na taka hrem theih an nih avangin tih hauh lo tur a ni. Dik lo taka thu thehdarh an awm chuan rang taka bawhzui nghal a ni ang a, a ṭul anga puanzar a nih bakah, ECI-ah emaw, CID Cyber Crime-ah emaw hriattir zel a ni ang.