HMSA-te'n badge dum an bel mek
Mizoram Health Multipurpose Service Association (MHMSA) chuan, an recruitment rules (RR) hman mek siam ṭha tura kum 2013 aṭanga an lo nawr tawh, sorkar an ngenna tihhlawhtlin a nih loh vanga lungawi loh lantir nan nimin aṭang khan badge dum an bel.
Lungawi lohna an lantir chungchangah hian MHMSA chuan, RR an hman mek chu an hnathawhnaah lungrual lohna siamtu a nih avangin, kum 1982-2011 chhunga an lo hman tawh aṭanga siamṭha leh tura sorkar ngen turin an general assembly-ah an lo pawm tawh tih an tarlang a; December 9, 2016-a an assembly-in an rel anga March 2017 thleng sorkar an nghah hnuah pawh an ngennain awmzia a neih loh avangin lungawi lohna an lantir ta tih an sawi.
MHMSA chuan, "Hetiang hian ruahmanna hreh tak chung leh siam lo thei loa kan ding hi pawi kan ti em em a. Kan nawrh vanga mipuite'n tuar an awm a nih chuan, an hriatthiamna kan ngen tak meuh a ni," an ti.
May 19 thleng an bel dawn a, thu lawmawm an hriat loh chuan May 22-26 chhung pen down strike neih leh May 29-31 chhung mass casual leave lak an tum a ni.
MHMSA hian health worker aṭanga supervisor-a kaisanna turah seniority-a 75% dah leh limited departmental exam (LDE)-a 25% dah ṭhin chu tihdanglam a, seniority-ah a vaia dah (100%) an duh a; supervisor aṭanga community health officer (CHO)-a kaisanna turah seniority-a 50%, LDE-a 25% leh BSE-a 25% dah chu tihtawp a, a vaia seniority-a dah an duh a ni.
MHMSA-ah hian Health department-a thawk, health worker, health supervisor leh community health officer-te an awm a, member 700 chuang awmin, Mizoram dapin an post mek a ni. RR buai avangin CHO post 32 turah 20 a ruak mnek a, health supervisor pawh 80 zet a ruak.
Post ruak zaah za promotion an dilna hnawl a nih hnuah Guahaty high court-ah an zualko tawh a, court chuan MHMSA chua thiam a lo chantir tawh a, tunah hian a changtu minister chuan a thiam hle nia sawiin an hruaitute chuan a ball chu DR&AR ah a awm nia an hriat thu an sawi bawk.