Convention Centre sak tum ṭhulh a ni

Khatla, Aizawla Circuit House dinna ṭhin hmuna Aizawl Convention Centre sak tum chu a hnuai lam lei a thâwl avang leh tun hnaiah a tlakhniam avangin ṭhulh.

Aizawl Convention Centre sakna tura lei laihna hmun a ngheh loh avang hian, lei a ngheh leh theih nan leh a chhak lama Baptist House dinna hmun leh Bible House dinna hmunte a tlakhniam chhunzawm loh nan tunlai hian lung rem mek a ni a; lungremte chu thirlêna lung phuar (gabion wall) anga siam mek a ni.

Engineer-te sawi danin, Geology & Miniseral Resources department-a mi thiamte'n leilung an enfiahnaah, lei laih chin hnuai lama lei thâwl awm chu a thûk zawng ft. 15-20 inkar vel niin an hria. A tihngheh nan cement concrete chhûn a ni tawh a, chumi hnuah a chung lamah lungrem, thirlêna tuam siam zui leh a ni.

Lei a tawlh zui lohna tura hna thawh chu a nih dan tur anga zawh a nih hunah chuan chhak lam aṭanga lei tawlh tur leh lei che turte ven theih beisei a ni a; Baptist House leh Bible House dinna lei leh a chhak lama kawngpui pawh bal thla loa venhim theih beisei a ni.

Bible House leh Baptist House dinna lei tlahniam tur ven theih beisei ni mah se, Circuit House hmun hluia Aizawl Convention Centre sakna tur hmunah chuan ruahman anga sak theih a ni dawn loa ngaih a ni.

Tarlan tawh angin, lei a chêt vang hian Bible House chu ṭhiah a ni tawh a, a sak ṭhatna atan Mizoram sorkar chuan a thlang lam sir, BSNL office kawmthlanga General Administration department ram chu sorkarin a pek dawn bakah, sak ṭhat nan sorkarin budget-ah cheng nuai 430 vel a dah nia thu dawn a ni.