National Dengue Day hmang

Nimin May 16 kha National Dengue Day a ni a, Mizoramah pawh Health department hnuaia State Vector Borne Di-sease Control Prog­ramme (SVBDCP) bultumin Aizawl Muni­cipal Cor­poration (AMC)-a veng 14 leh district hrang hrangah hman a ni.

National Dengue Day pual hian Aizawla veng thlan bik 14-ah dengue natna chungchanga hriat tur pawimawhte inzirtirna hun, Awareness Campaign cum Sources Reduction Drive neih a ni a; Health department hotute'n hmanpuiin, campaign/drive neihna venga local council leh YMA hruaitute'n an lo puibâwm a ni.

Dengue Day hi district khawpui hrang hrangah hman a ni bawk a; dengue natna pu darhtu thosi ûm bo dan an inzirtir bak a ni a, thosi pian theihna hmun tihbo a nih theih nan hnatlangte neih a ni bawk.

Kum 2012 khan Health department-a district pakuaah dengue veia rinhlelh mi 90 an awm a, chu'ng zinga mi paruk chuan an vei tih hmuchhuah a ni a, thihpui erawh an awm lo.

Kum 2013-ah dengue vei mi pasarih chhinchhiah a ni a, kum 2014-ah mi 19, kum 2015-ah mi 43, kum 2016-ah mi 580 leh kuminah January-March chhungin mi 24 hmu chhuah a ni tawh bawk. Dengue vei hmuh chhuah awm nual tawh mah se, tun thlengin thihpui an la awm lo a ni.