Mizo Carbon Product chungchangah Vanramchhuangi High Court-ah a zualko

Vanramchhuangi, Chaltlang Veng chuan Thawhṭanni khan Aizawl Press Club-a thuthar thehdarhtute a kawmnaah, Mizo Carbon Product chungchangah Gauhati High Court, Aizawl Bench-ah public interest litigation (PIL) a thehluh thu a sawi.

Vanramchhuangi hian kum kal ta aṭangin Central YMA-in Mizo Carbon an chhui tawh thu a sawi a, "An chhuina aṭangin thil felhlel a awm tih hai rual lohin boruak a awm a, mimal leh political party-te pawh an inrawlh a, sorkar laipuiin a hriat veleh chhui chiang turin Mizoram sorkar thurâwn a pe a ni," a ti.

Vanramchhuangi sawi danin, Mizo Carbon chu ACB-in an chhui mek a, mahse, ACB chu Chief Minister leh minister ṭhenkhatte thu hnuaia awm a nih avangin ho takin a tawp ang tih a hlauh avangin High Court-ah zualko a ni.

Mizo Carbon-te'n central subsidy an hmuh danah CM Lal Thanhawla chu a mawhphurtu ber pakhat a nih thu sawiin Vanramchhuangi chuan, "Sum an dilna pawmpui hunte hi Taxation department Pu Zodintluanga'n a chan lai a nih avang­in he department enkawl tura ruattu hian ruat chhan a neih ngei ka ring. A kaihhruai sorkara thil thlengah hian a mawhphurtu ber chu CM a nih avangin a tel vein ka ring a, mangṭang a ei ve pawh ka ring," a ti. Minister dang Lalsawta, H Rohluna leh Zodintluanga te pawh an inrawlh a rin thu a sawi.

Minister rinhleLh chhan a sawite
Lalsawta: Zodintluanga hnua Taxation department enkawltu a ni a, a hun chhungin Mizo Carbon-in thil dik lo tam tak an la kalpui reng. Tun hnaiah pawh khan SLC-in cheng nuaih sang tel an la ngaihtuah dan aṭangin a mawhphurtu zingah a tel a ring.
H Rohluna: Central Transport Subsidy (CTS) leh Central Capital Investment Subsidy (CCIS) dil tura nodal department, Commerce & Industries enkawltu a ni a, a hriat loh leh remtihna loin sum hlawm lian, dik si lo a kal theiin a ring lo a, manṭang a ei ve ngei niin a hria.
Zodintluanga: Mizo Carbon proprietor Dr Makimi u pasal a nih avang te, a hming tumtu berin sumdawnna a buaipui loh avang te, thil awm lo pawh Taxation gate paltlang thei khawpa Mizo Carbon lalna department enkawltu a nih avang leh, a hun chhungah ngei thil dik lo a thlen avangin a mawhphurtu dik tak a nih a ring.