CM-in thlai sâwngbâwlna hmun a hawng

Phaibawkkawn, Selinga cheng nuai 500 vel sênga din, Mizoram Food Processing Research & Training Centre (MFPRTC) chu Thawhṭanni khan chief minister Lal Thanhawla'n a hawng.

Chief Minister chuan, Mizoin ei tur sawngbawlna (food processing) lam an la hmelhriat tâwk loh chhan ber pakhat chu thar chhuah a la tam tâwk loh vang leh company-te mamawh anga tam thar chhuah a la nih loh vangte nia a lan thu a sawi a, "Kan thar chhuah tam ber ṭhenkhat pawh sâwngbawl loin phai lamah kan thawn chhuak mai ṭhin a ni," a ti.

Khawvel thiamna hrang hrangin Mizoram a thlen ve chinah food processing pawimawhna Mizote'n an hre chho mek tih sawiin Lal Thanhawla chuan, "Food processing-ah sorkar anga hmalakna duh angin a hlawhtlin thei lo," a ti a; food processing chu mimal ṭhahnemngai leh, thiamna leh theihna neite'n tihtakzetin buaipui se, a hlawhtlin theih zawk a beisei thu a sawi.

Chief Minister chuan, mimalin industry an din a, a subsidy tur ngau ngau an melh hmasak chuan a hlawhtling thei lo tih a sawi a, "Hetiang rilru hi kalsan a ṭul tawh. Ṭhalai entrepreneur, tih tak zeta hmalak tum an awm hi a lawmawm a, an lakah hian beiseina sang tak ka nei a ni," a ti.

Minister R Lalzirliana pawhin thu sawiin, tun hmaa sorkar leh sorkar puihbawmnaa din thil sawngbawlnate chu a hlawhtling lo tih a sawi a, "MFPRTC hi chu a hlawhtling leh a dinchhuah ngei ka beisei," tiin, MFPRTC enkawlna kawnga sorkar anga thu neih tlem pawimawh a tih thu a sawi.

MFPRTC hi Mizorama thei leh thlai thar chhuahte awmze nei taka zirchianna leh sumpai chang thei tura a sawngbawl dan mipuiin an zir theihna hmun atan ruahman a ni a; Ministry of Commerce & Industry hnuaia hmarchhak atana Export Development Fund sum hmanga din a ni. A enkawltu leh viltu chu Commerce & Industries department a ni dawn a, mahse, a hna thawh leh ni tin enkawlnaah sorkar inrawlh loin, Centre Director-in a enkawl dawn a ni.