Mamit district hmasawnna tur CM Hawla hnenah thlen

Mamit District Ṭhalai Pawl (MDṬP) hruaitute chuan, nimin khan chief minister Lal Thanhawla a pisaah an hmu a, Mamit district hmasawnna tur hrang hrangte an thlen.

MDṬP chuan, Mamit District Hospital-ah khum 30 chauh a awm avangin an district mipui mamawh a phuhru zo tawh lo tih sawiin, CM chu damdawi-in building thar khum 50 awm theihna tur sak a nih theih nan hma la turin an ngen a; Mamit district-in kawlphetha hnianghnâr zawka an neih theih nan Bairabi aṭanga kawlphetha lak luh a, Mamitah 132/33 KV sub-station dah turin an ngen.

Rawpuichhip, Kanghmun, Chungtlang, Ṭuahzawl, Rulpuihlim leh Reiek tlangdungah police out-post a awm loh avang­in dan bawhchhiate chung­ah action lak a har ṭhin tih sawiin, he tlangdungah hian police out-post dah turin an ngen a; Lengpui - Tripura NH-44A double lane-a siam mek chu chak zawka siam a nih theih nan hmalakpui turin an bawk. NH-44A kawngpui hi December 2011 aṭangin Gayatri Project Ltd.-in an thawk ṭan a ni.

Mamit district-a khaw hrang hrangah inkalpawhna ṭha a awm theih nan NEDP leh PMGSY hmangin kawng a tam thei ang ber laihsak tur te, District Backward Development Fund sorkar laipuiah Mamit district tan dillsak tur te, Mamitah LEIT department hawng tur te, Mamit khawpui châwmtu tui lakna pump khawl thar bunsak tur leh tuizem lian siamsak tur te, Mamit district-ah sport complex changtlung tak siamsak turtein an ngen bawk.

MDṬP chuan, sorkar­in Mamit district hmasawn nan sorkar department eng emaw zat a hawnsak tawh avanga an lawm thu Chief Minister an hrilh a; chutih­rualin, sorkar building sak mek - Polytechnic, DIET, Fire department, Treasury, Nurse Training Center leh a dangte chu tun sorkar kum chhunga hawng hman turin an ngen nghal a ni.