Kawngpui a ṭhat zawk theih nan PWD leh YMA-in MoU an ziak

Mizorama kawngpuite a ṭhat zawk theih nan PWD leh YMA chuan a ṭum hnihna atan nimin khan thawhhona thuthlung, memorandum of understanding (MoU) an ziak leh. MoU hmasa aia ṭha zawk leh ṭangkai zawka thawhho dan tur sawiho a nih hnuah MoU-ah ruahmanna thar telh a ni.

Thawhhona thuthlung hi PWD engineer-in-chief conference hall-ah ziah a ni a; PWD aiawhin engineer-in-chief Bowman-a leh YMA aiawhin Central YMA president Lalngheta ten hming an ziak. Thuthlung hi kum thum atan a ni a, review meeting neih ṭhin tura ruahman a ni.

PWD leh YMA hian Mizorama kawngpui a ṭhat zawk theih nan tiam chin awm loin thawhhona thuthlung an lo ziak tawh a, chu chu duhtâwk loin, thuthlung hmasaa fuh tâwk lote siamṭhain, belh ngaite an belh hnuah thawhhona thuthlung an ziak nawn leh a ni.

CYMA president Lalngheta chuan, YMA leh PWD-te thawhhonaah duhthusam thleng lo mahse hmasawnna a awm niin a sawi a, "Kawng ṭha kan duh a, chuvangin, YMA chuan sorkar aṭangin cheng khat mah beisei loin kan thawhpui a ni. CYMA, sub-headquarters, group leh branch-te'n kawng ṭha zawk kan neihna tura hma an laknaah senso an intum vek," a ti.

YMA chu kuang lo nawr tia sêl an awm ṭhin tih sawiin CYMA President chuan, "YMA hian kuang lo tak tak pawh a nei lo. A changin min dem lawm lawm a, tihfuh tâwk loh changte pawh a awm," a ti a, an phâk tâwkin ram leh hnam tan hma an la lak reng thu a sawi.

PWD hotute chuan, YMA nen MoU an ziah avangin contractor zingah eng emaw zat lâwm lo an awm rualin, lawm em emte pawh an awm thu an sawi a, "Contractor lawm em emte chu kan contractor neih ṭhat leh thawk ṭhate an ni tlangpui. Heng hote hi chu YMA nen pawh ṭha takin an thawkho ṭhin," an ti.

PWD-ah junior engineer indaih lohna a nasat thu sawiin PWD hotute chuan, "Tun dinhmunah JE post ruak hnawhkhah loh 67 a awm bakah, eng emaw zat chuan dam lohna avangin hna an thawk thei lo. Kan JE-te hian kan work load pangngai aia lêt hnih/thum vela tam an thawk ṭhin," an ti a; JE-te chu an buai êm avangin duh angin hna thawhna hmun an tlawh ṭhat hman loh thu an sawi a ni.