Sorkar hotute leh pawl hruaitute'n Covid-19 an thlir ; Inkhung hran leh sûlhnu chhui ṭul ti lo Hripui veite in lama inenkawl uar ṭha ti

Health minister Dr R Lalthang­liana hoin nimin khan sorkar official leh páwl hrang hrang aiawhte an ṭhukhawm a, Covid-19 veite chu an dinhmun a ṭha lo a nih loh chuan in lama inenkawl uar ṭha an ti a, hripui veite sûlhnu chhui (contact tracing) leh an chhungte inkhung hran (quarantine) a ṭul tawh loa ngaih a ni.

Ṭhutkhawmah hian Health & Family Welfare Board vice chairman Dr ZR Thiamsanga, MLA, Health secretary Esther Lalruatkimi, School Education, Higher & Technical Education leh Finance department hotu te, Aizawl DC, ZMC hotute leh Indian Medical Association, Mizoram Kohhran Hruai­tute Committee, Central YMA, VC/LC pawl leh Non Govt. Hospital Asso­ciation of Mizoram aiawhte an tel.

March 21, 2022-a Covid-19 inkaihhruaina tihchhuah, tuna hman mek chungchanga State Level Expert Team on Covid-19 Management rawtna siamte sawiho a ni a; mipui tana phurrit lo leh eizawnna nghawng nasa lo thei ang bera inkaihhruaina siam a ṭul thu sawi a ni. Hripui vei inringte tan a rang thei ang bera swab sample endik a pawimawh thu sawi a ni a; hripui vei tharte chu an ngaihtuahawm a nih loh chuan mahni in lama inenkawl uar ṭha tih a ni bawk.

Covid vaccine lak a pawimawh thu mipuite'n hre thar se an duh thu tarlan a ni a, "A bik takin precautionary dose lak hun tawhte leh dose hnihna lâk hun tawhte'n lak ngei a ṭul," an ti.