Myanmar aṭanga bungraw lut tur Champhai leh a chhehvelah dang zel

Champhai District Lirthei Inzawmkhawm Pawl (CPDLIP) chuan Myanmar aṭanga dan loa Mizorama bungrua lutte an dang chhunzawm zel a; an thil phûtah sorkar aṭanga chhànna an hmuh hma chuan dan zel an tum.

Tarlan tawh angin, CPDLIP hian Myanmar aṭanga dan loa Mizorama bungrua lut zingah kuhva rah chauh ngaimawh bik chu ṭha ti loin, July 13, Nilaini zing aṭang khan Myanmar aṭanga bungraw rawn lutte an dang ṭan a; zalen taka kuhva rah phurh ve theih an duh a ni.

CPDLIP hnuaia pawl hrang hrangte chuan an huam chhung ṭheuhah Myanmar aṭanga bungraw lut tur leh Champhai aṭanga chhuak tur an dang a, Champhai leh Dungtlang police checkgate bulah duty an indah.

Zokhawthara lirthei inzawmkhawm pawl chu CPDLIP-ah an tel ve loh avangin bungraw lut tur an dang ve lo a; Zokhawthar aṭanga bungraw kal tur chu Mélbûk leh Mualkawiah dan a ni.

Vanglaini palai zawhna chhángin CPDLIP hruaitute chuan, bungraw dang ang thoa kuhva rah zalên taka phurh theih an duh ber tih an sawi a, "Kuhva rah do tlat bik hi sumdawnnaa inîtsîknaah kan ngai. Kuhva rah kher lo pawh dan loa Myanmar aṭanga rawn lut tam tak a awm," an ti.

CPDLIP hruaitute chuan, sorkar aṭanga an thil phût chungchangah thu lawmawm an hmuh hma chuan an thil tih chu chawlhsan an tum loh thu an sawi a, "Awmhmun kan khuar ṭha deuh deuh zel," an ti a; sorkar an ngaihchàn tawp thu an sawi.