Bawlhhlawh sâwngbàwlna tur enfiah

Mizoram Assembly Committee on Local Fund Accounts (COLFA) chuan, nimin khan Chhiahtlang dáia Serchhip Solid Waste Management Centre siam mek a hmunah an enfiah. Bawlhhlawh sâwngbàwlna hmunhma siamna atan cheng nuai 60 ruahman a ni.

COLFA member-te chu an chairman C Lalmuanpuia hoin an thawk chhuak a; Chairman chuan, bawlhhlawhin harsatna a siam nasa tih sawiin, "Kan changkang zel a, bawlhhlawh kan ngah tial tial a, mipui kan pung zel bawk. Bawlhhlawh sâwngbawlna ṭha kan mamawh em em a ni," a ti a, bawlhhlawh sâwngbawlna ṭha a awm theih nan COLFA-in theihtawp an chhuah zel a ṭul thu a sawi.

Serchhip khawpui tana Solid Waste Management Centre tur hi Chhiahtlang dáia Tualthah Mualah buatsaih a ni a, square metre 4,000-a zau tur niin, a hmunhma buatsaihna atan Special Assistance for Capital Expenditure Free Loan cheng nuai 60 hmuh a ni. Contractor chu Lalthianghlima a ni a, kumin January thlaah hna ṭan niin, zawh thawkhat a ni tawh a, tihpuitlinna tur sum hmuhna tur dap mek a ni.

Solid Waste Management Centre siam mek enfiahnaah hian COLFA Chairman bakah member dang - Nihar Kanti Chakma, C Lalsawivunga leh Dr Vanlalṭanpuia te an tel a; Serchhip additional DC Lalmuansanga Ralte, additional SP Saidingliana Sailo leh UDPA department hotute'n an ṭawiawm.