Soft copy-a lehkha inthawn leh indawrna School Education dept-in a kalpui ṭan
School Education department chuan sorkar official-te leh mipui awlsam zawkna atana an department-a lehkha lut leh chhuakte soft copy hmanga tih tura ruahmanna an siam chu nimin aṭang khan an kalpui. Lehkha (hard copy)-a thehlut duh tan thehluh theih zel a ni tho bawk.
School Education director Dr H Lalthlangliana'n July 12, 2022-a hriattirna (circular) a tihchhuaha a lan danin, School Education directorate-a lehkha (soft copy) thehluh tur nei tan email dirsemz@gmail.com ah emaw, phone no. 8798068977 / 8837251432-ah emaw email/whatsapp hmangin thawn theih a ni.
Lehkha thehluh chu print chhuah tlâka fiah ṭha a ngai a, thehluttute'n phone number ziah lan ngei a ngai bawk. Lehkha thehluttute hnena Directorate-in a thawn lêt ngaite pawh email/whatsapp hmangin an thawn dawn a, ṭul bik thilah lo chuan hard copy an thawn dawn lo tih an tarlang.
School Education Director chuan, "Tih dan phung pangngaia lehkha thehlut duh zawk chuan thehluh theih tho a ni. Hmun hla tak tak aṭanga lehkha thehlut tura hun leh sum tam tak sénga kal ngai ṭhin tihziaawm nan ruahmanna hi siam a ni a. School Education department hnuaia thawktu zawng zawng leh mipuiin he ruahmanna hi hman ṭangkai ṭheuh tum tur a ni ang," a ti.
Vanglaini palai zawhna chhangin Director chuan, an hmalakna chu thil har a nih loh thu a sawi a, "Lehkha thawn dawnna tur leh thawn chhuahna tur bik phone pahnih kan lei a, a khawihtu tur bik kan inruat a, harsatna a awm lo," a ti a; an ruahmanna thar chu mipuiin an ṭangkaipui ngei an beisei thu a sawi.