NHM-a thawkte nuar zel

National Health Mission (NHM) hnuaia thawkte chu an hna zawm ngei turin Mizoram sorkarin hriattir mah se, an nuar chhunzawm zel a, niminah pawh hna chhunzawm an awm lo nia thu dawn a ni.

Tarlan tawh angin, NHM hnuaia thawkte hian an thil phûtte sorkarin a tihhlawhtlin loh avangin July 11-13, 2022 chhung khan mass casual leave an la a, sorkar hotute nen an inbiakrem theih loh avangin nimin aṭang khan tiam chin awm loin an nuar chhunzawm a ni.

Hetih lai hian, July 13, Nilaini khan Mizoram sorkar leh NHM Mission Director chuan NHM hnuaia thawkte chu July 14, nimin aṭanga an hna chhunzawm tur leh hna an chhunzawm loh chuan hrem an nih tur thu an hriattir a ni. Chuti chung chuan NHM hnuaia thawkte chuan nimin khan hna an chhunzawm lo.

NHM Employees Union, Mizoram (NEUM) President chuan Vanglaini palai zawhna chhángin, "Kan member zingah hna chhunzawm an awm loin kan hria," a ti a; nimin khan district tin aṭangin NEUM office bearer-te Aizawlah an kal khawm a, vawiinah an awm zel dan tur an ngaihtuah dawn tih a sawi.