Duhoma'n NHM-a thawkte thlavang a hauh

ZPM leader Lalduhoma chuan nimin khan press statement tichhuakin, National Health Mission (NHM), Mizoram hnuaia thawkte an nawrh avanga Mizoram sorkarin a vau zui chu hriatthiam har an tih thu a tarlang a, NHM-a thawkte harsatnate a rang thei ang bera sukiang turin Mizoram sorkar a phût.

Lalduhoma chuan, Mizorama NHM hnuaiah thawktu mi 2,000 chuang an awm a, kumkhuaa sorkar laipui ringa kal tur a ni lo tih sawiin, "Zawi zawia state sorkar kuta awm tur an ni. India rama state zawng zawng tih theih deuh thaw hian an regularise (dah nghet) tawh a, kum tam tak chhung Mizoramah kalpui a ni tawh chung hian mi pakhat pawh an la regularise thei lo a ni," a ti.

NHM hnuaia thawkte chungchang zir chiang turin sorkarin a din study team-in report an thehlut tawh tih sawiin Lalduhoma chuan, "Eng nge an zir chhuah a, eng nge an recommend tih pawh thup tlat a ni a, tunah hian loh theih loh avangin an nuar ta a ni," a ti a; tun dinhmunah Health department-a thawk zinga 60% vel chu NHM hnuaia thawk an ni tih sawiin, an nawrh tâk avangin damlo enkawlna a kal mumal thei lo tih a sawi.

ZPM Leader chuan, NHM-a thawk tam tak chu kum tam tak thawk tawh an ni tih sawiin, "Covid-19 hripui lên lai pawhin an nunna dahkhamin mipui damlote min enkawl a ni. Chutih lai chuan, sorkar hian vau zuiin, bànahte a vau zui hi hriatthiam har kan ti hle," a ti.

Lalduhoma chuan, "Kan unau nuar mekte kan sorkarin a tuam dam thei lo hi a pawi kan ti a, damlo tam takin nunna hlu tak an chàn phah ang tih kan hlau. Kan unau nuar mekte hi kan lainat a, an harsatnate a rang thei ang bera sukiang turin sorkar kan phût a ni," a ti a; Mizoram sorkar chu a duhna lamah chuan a chak a, contract hna inpekah an chak em em thu leh NHM hnuaia thawkte chu damlo enkawlna thil a nih avangin an damdawi pe vat turin sorkar an phût thu a sawi bawk.