KHAWTHLIR

Dragon fruit thawn
Chief minister Zoramthanga chuan July 13, Nilaini khan Bangladesh prime minister Sheikh Hasina hnenah Mizorama thar dragon fruit quintal khat a thawn. Sorkar thuchhuah tarlan danin, July thla tìra Bangladesh Prime Minister-in Chief Minister hnena theihai a thawn vanga lawmthu sawina leh Mizorama dragon fruit chawi lârna atan dragon fruit hi a thawn a ni.

Zualko theih
Power & Electricity department chuan thuchhuah siamin, kalphung thar an hman avangin online-a electric bill peknaah harsatna a awm theih thu an tarlang. Bill dik lo leh felhlel nia inhriate tan complaint counter-ah office hun chhungin complaint theih reng a nih thu leh, online payment-a harsatna neite tan phone number 9436141511, 7832871956 leh 8575517333-ahte office hun chhungin zawhfiah theih a nih thu an tarlang bawk.

MRB officer training
Mizoram Rural Bank leh Banker's Institute of Rural Development, Kolkata chuan nimin khan MRB Head Office, Aizawlah MRB officer-te tan ni thum awh tur training an buatsaih ṭan a; MRB branch hrang hranga manager mi 24 an tel. Training-ah hian bank leh sum enkawl chungchang te, agriculture kaihhnawiha hmasawnna awm theih dan te, ranvulh leh ar vulh aṭanga siam chhuah theih thilte an zirho dawn a ni.

Heroin man
Champhai police-te leh 8th Assam Rifles sipaite chuan July 13, Nilaini khan Champhai khawpui chhunga Dawrkai kâwnah heroin no. 4 gram 271 an man a, a neitua puh mi pahnih an man nghal bawk. Heroin an man hi Rs 1,35,50,000 mana chhût a ni.

Pipe phúm dawn
SIPMIU chuan vawiin chawhma dar 11 aṭanga tlai dar 3 thleng Millennium Centre leh Chanmari-Chaltlang road inkarah pipe an phûm dawn a, hei vang hian hna thawhna huam chin kawngpui sirah hnathawh tibuai theia lirthei dah phal a ni lo.