Thawk rim apiang an dingchhuak ang tih hi kan thurolum - ZPM Working President
ZPM working president K Sapdanga chuan, ZPM a sorkar chuan a thawk rim apiang an dingchhuak ang tih chu an thurolum a nih thu leh ram an dah pawimawh hmasak thu a sawi.
K Sapdanga hian MLA Dr Vanlalthlana leh hruaitu dangte nen Hachhek biala khaw hrang hrang an fannaah thu sawiin, "ZPM a sorkar chuan a thawk rim apiang an dingchhuak ang tih hi kan hotute thurolum a ni a, chu chu party lam ni loin ram dah hmasak pawimawhna a ni. Kan party-a mithiamte'n leilung, sik leh sa leh ram bial mipui an zir a, policy an duang tawh a, kut hnathawktute chanvo hi kan dah pawimawh berte zinga mi a ni," a ti.
ZPM Working President chuan, "Sorkarna hi intihropui lam a ni lo, mipui tana mawhphurhna lâk ngam a ni zawk," a ti a; mipui hmasawnna turin leilung hausakna aṭanga dehchhuah tihpun a ngai a, Mizorama kut hnathawktute'n theihna an neih thu leh sorkar thuneihna hmangin kawng a dappui a ṭul thu a sawi.
Mizoram kalphungah dan dik loa thil kal a awmin sorkar dodal a ngai ṭhin tih sawiin Sapdanga chuan, "Kan bei a dawng a, hma lam hun kan thlir thim a, mipui náwlpui economy chawikâng theitu tur ber kan thawh chhuah thlai tharte pawhin natna an vei a, a damdawi chawh dik a ngai a ni," a ti bawk.
MLA Dr Vanlalthlana pawhin thu sawiin, "Kut hnathawktute natnaah hian kan na ve a ni. Eptu party kan ni a, kuhva issue pawh kan zir a, kan chiang zel, Assembly session thlengin kan aupui tawh a, dan rorelna fel tung ding turin theihtawp kan chhuah zel dawn a ni," a ti.
ZPM hruaitute hi Hachhek Bial Kuhva Chingtu Pawl hruaitute nen an inkâwm a; Réngdil, Zamuang leh Kawrthah khuaa kuhva chíngtute nen an inkâwm bawk. Kuhva chíngtute chuan, an hrawkhrui vénga a kaw tàwpa ṭang an nih thu te, kut hnathawktu tam zawkin loneih an bànsan tawh thu te, an dinhmun enin duh thlan tur dang an neih tawh loh thute an lo hrilh a ni.