Sarâng tihrêm dan tur sawiho

Champhai district bawrhsap James Lalrinchhana hoin nimin khan Champhai district-a hman khat daih sarâng (single use plastic) tihrêm dan tur sawiho a ni a; September 1, 2022 aṭangin khauh taka dan kenkawh a, dan bawhchhiate lakah hremna lekkawh ni se, an ti.

James Lalrinchhana chuan, hman khat daih sarâng tihtawp tuma hmalak mek a nih thu sawiin, "Vawi leh khata tihhlawhtlin nghal a harsat pawhin, a tahtawlin inzirtirna mumal tak neia hmalak a ṭul," a ti a, ṭan rual a pawimawh thu a sawi.

Ṭhutkhawmah hian hmalak dan tur sawiho a ni a; sorkar pisa, zirna-in, damdawi-in, clinic, infiamna hmun leh mipui punkhawmna hmunahte sarâng pan chi hmang lo tura ngenna tihchhuah an rêl. Dawr, bazar, catering leh hmun dangah inzirtirna leh inkawhhmuhna mumal tak siam te, digital flyer siama thehdarh te, sorkar department tinah Single Use Plastic Enforcement Squad din leh a ṭul anga endikna kalpuite an rél bawk.

Hmalakna hmasa atan August 2022 thleng sarâng pan chi hmang nasa dawrkai leh thil zuarte bakah, mipui náwlpuiah inzirtirna neih an rêl bawk a ni.