MSSC Non-Residential Coaching hawng

Sports & Youth Services minister Robert Romawia Royte chuan July 13, Nilaini khan Hawla Indoor Stadium-ah Mizoram State Sports Council (MSSC) Non-Residential Coaching programme a hawng. Minister chuan, programme chuan India ram chauh ni lo, khawvel inelnaa tel pha a chher chhuah theih a beisei thu a sawi.

Robert Romawia Royte chuan, MSSC hmalaknaa Non-Residential Coaching Programme hawn a ni chu Mizoram leh Sports department bung thar kaina a nih thu sawiin, "Sports chi hrang hrang kaltlanga eizawnna bakah, taksa insâwizawina hmun ṭha leh remchang neih theih nana hmalak zel sorkarin a ngai pawimawh a, Sports Policy ṭha tak a duang a, policy hi kalphung fel tak neia duan a ni," a ti.

SYS Minister chuan, infiamna chi hrang hrangah thawhrimna leh inpumpekna hmanga Mizo ṭhalaite'n hlawhtlinna an chan theihna atana kawng sahsak chu Sports Policy tum lian ber zinga mi a nih thu a sawi a; nu leh pate chu an fate'n infiamna lama hun an hman tam theih nana ṭang tur leh hriatthiamna thui tak nei turin a ngen a ni.

MSSC Non-Residential Coaching Programme hi thla li chhung neih tur a ni a, kum 17 hnuai lam tana buatsaih a ni. Basketball coaching-ah mipa 51 leh hmeichhe pakhat, boxing coaching-ah mipa 30 leh hmeichhia pali, table tennis-ah mipa 30 leh hmeichhia pariat, tennis-ah mipa 23 leh hmeichhia 16, weightlifting-ah mipa 24 leh hmeichhia 16 leh, wrestling-ah mipa 17 leh hmeichhia 13 an awm mek a, an vaiin mi 227 an ni.