Johnson College inlawmna leh inthlahna

Johnson College chuan nimin khan Vanapa Hall-ah zirlai lut tharte lawmna leh zirlai chhuak turte thlahna ‘Freshers Social cum Graduation Programme' an hmang a, Higher & Technical Education minister Dr R Lalthangliana'n a hmanpui.

HTE Minister chuan, zirlaite chu an tumruha an taimâk chuan dinhmun pawimawh tak an chelh thei tih hrilhin, eng chhungkua aṭang pawhin hlawhtlinna neih theih a nih thu a sawi a; chhungkaw eizawnna lamah harsatna nei an awm pawhin, an nihna pawt hniamtu ni lo a, tumruhna petua hmang turin zirlaite a fuih.

Dr R Lalthangliana chuan, Johnson College-in department tlángláwn paruk a neih mek chu duh tâwk mai lo a, tunlai thiamna hman ṭangkai theihna leh hna hmuh theihna leh eizawnna neih theihna ang zirlai (course/stream) neih belh tum turin zirtirtute a chah a; college tihchangtlun leh tihhmasawn kawngah sorkarin a tih thei ang ang a ngaihtuah zel dawn tih a sawi bawk.

Inkhawm hi chawhma lamah principal Prof. K Vanlalmawia'n a kaihruai a, chawhnu lamah award chi hrang semna leh zirlai ti ṭhate chawimawina hun hman a ni.

Johnson College hi kum 1993-a din a ni a, kum 2002-ah deficit-ah dah niin, kum 2007-ah provincialise a ni. Tun dinhmunah department paruk awmin, zirlai 1,100 vel leh zirtirtu 32 an awm a, non-teaching staff 13 an awm bawk.