July thlaah hripui vei 1,125 hmuh a ni tawh

July 13, Nilaini khan Mizoramah Covid-19 vei mi 105 hmuh chhuah a ni a, tun July thla ni 13 chhungin positive mi 1,125 hmuh tawh niin, June thla chhunga hmuh zat aiin a tam tawh zawk. Nimin khan hripui vei dam tawh mi 16 chhuahtir an ni a, Covid-19 vanga thi an awm lo.

Nilainia Covid-19 positive hmuh thar mi 105-te chu mipa 50 leh hmeichhia 55 an ni a, Rapid Antigen Test hmanga hmuh chhuah vek niin, positivity rate 16.75% a ni.

July thla ni 13 chhungin Mizoramah Covid-19 vei mi 1,125 hmuh chhuah a ni tawh a, thla hmasa June-a hmuh zat 770 aiin 355-in a tam tawh zawk.

IDSP record angin, Mizoramah Covid-19 vei 2,30,229 hmuh chhuah a ni tawh a, mipa 1,07,170 leh hmeichhia 1,23,059 an ni a, mipa aiin hmeichhia 15,889-in an tam zawk. Nimin tlai dar 5 thleng khan mi 2,28,575 (99.28%) chhuahtir an ni tawh a, mi 706 (0.31%) thi tawhin, enkawl mek mi 948 (0.41%) an awm.

Covid-19 vei enkawl lai an pung zel a, nimin tlai dinhmun angin, Mizorama district 11 zingah Covid-19 positive awm tawh rih lohna Lawngtlai district chiah a awm. Active case tamna ber Aizawl district-ah mi 492 an awm a, Lunglei district-ah mi 234 an awm bawk.