Mizoram Bru Displaced People Forum-in Supreme Court-ah YMA & MZP hêk

Mizoram Bru Displaced People Forum (MBDPF) chuan Supreme Court-ah YMA leh MZP-te chu anmahni tihduhdahtuah an puh a; Supreme Court hian Central YMA leh MZP chu insawifiah turin a hriattir.

Central YMA leh MZP hruaitute hnen aṭanga thu dawn danin, Supreme Court hian May 8, 2017-a insawifiah turin CYMA leh MZP hruaitute a ko a, mahse, lehkha an hmuh tlai avangin ukil rawih tur buaipuina hun nen an insawifiah hman lo. Court chuan insawifiah tura inbuatsaihna atan chawlhkar riat chhung hun a pe leh a ni.

CYMA leh MZP-te hian ukil in-ṭâwmin an ruai dawn a, tunah hian an ukil rawih tur an be fel thawkhat tawh. Supreme Court hmaa insawifiah dan tur an buaipui mek a, Court-in hun a pek chhung ngeia inpeih hman an tum a ni.

Central YMA chuan thuchhuah siamin, "Mizoram aṭanga mahni duh thu ngeia chhuak, Tripura Refugee Camp-a awm mek Tuikuk-te'n Mizoram Bru Displaced People Forum hminga Supreme Court-a India sorkar, Mizoram sorkar, Tripura sorkar leh Election Commission of India-te an khinna lehkhaah, YMA leh MZP-te anmahni tiduhdah a, militant ang hiala min puh hi Central YMA chu a lawm lo hle," an ti.

Bru-te'n an puhnaa insawifiah tura Supreme Court-in a tih angin insawifiah ngei an tum thu tarlangin CYMA chuan, "Min puhna dik lo tak hi sawifiah a, thu dik thehluh ngei ṭha kan ti. May 16, 2017-a CYMA executive committee meeting chuan a ṭul anga bawhzui ni se kan ti," an ti a; Tripura sorkarin refugee camp-a Bru-te Aadhaar card a siamsak chungchang pawh a ṭul anga chhui zui an tum thu an tarlang.