MSB-in minority scholarship sawifiah
Mizoram Scholarship Board (MSB) secretary JH Zoremthanga chuan thuchhuah siamin, minority scholarship bikah MSB-in inrawlhna an neih loh thu a tarlang a, "Delhi aṭangin zirlai naupangte account-ah pawisa thun a ni," a ti.
JH Zoremthanga tarlan danin, kum 2015-16 aṭangin sorkar laipuiin minority scholarship bik chu zirlaite account-ah Mizoram sorkar kaltlang loin a thun a, dilna pawh online veka tih a ni.
India ram state tinte'n mihring tam dan azirin minority scholarship-ah quota an nei a, Mizoram chuan pawl 10 hnuai lamah 11,971 leh pawl 10 chung lamah 1,995 a nei.
Hetih lai hian, scholarship diltu pawl 10 hnuai lamah zirlai 70,042 leh pawl 10 chung lamah zirlai 2,153 an awm a ni.
MSB Secretary chuan, minority scholarship chu Mizoramin a quota bak a hmuh dawn loh thu sawiin, "Kuminah pawh a diltu tam zawkin an dawng lo ang. Tute nge dawng pawh min rawn hriattir ngai lo," a ti.