KHAWTHLIR

Oil harsa ṭan
Cachar-a petrol leh diesel an lakna ber Ramnagar-ah tanker khalhtute an nawrh vangin nimin tlai aṭang khan oil a harsa ṭan. Thudawn danin Silchar leh a chhehvelah oil phurte tan zing dar 10 aṭanga zan dar 8 inkarah kal phal a ni lo a, hei vang hian oil phurtu driver-te'n harsatna nasa tak an tawk ṭhin a, no entry hlih phutin nimin piah aṭang khan tanker-te chu an nuar a ni.

Lirthei dah khap
Traffic Police-te chuan thupek chhuahin, SIPMIU-in Tuikhuahtlang tláng záwl leh Environment & Forest office inkar kawngah pipe phûm hna an thawh avangin May 24 thleng chu Tuikhuahtlang chhip huam chhung panna awm chhun, Sikulpuikawn, Govt. Aizawl College panna kawngah lirthei dah leh MMV leh a chung lam tlân an khap.

Lawngtlaiah training
Election Commission of India ruahmanain, nimin khan Lawngtlai DC conference hall-ah 'Lawngtlai District Level Training on Electoral Registration Officer (ERO) Net' buatsaih a ni a; ERO leh AERO-te chu Election Commission-in tih tur a ruahmante internet hmanga kalpui dan zirtir an ni.

Hnathawh thlirho
Kolasib District Consultative Committee chu nimin khan DC Dr. Arun T hoin DC conference hall-ah an ṭhukhawm a, January - March, 2017 chhunga an district-a bank-te hnathawh an thlirho. Dr. Arun chuan bank-te chu mipuite tana dawr nuam zawk leh pan nahawm zawka awm turin a ngen. Kolasib district-ah hian bank pasarih a awm.

Zirtirtu hlawh tum
Hortoki V/C chuan nimin khan an khuaa HSLC leh HSSLC pass tharte lawmpuina hun, Hortoki H/S-ah an buatsaih a, bialtu MLA Hmingdailova Khiangte-in a hmanpui. Hmingdailova chuan, Hortoki H/S-in mathematics zirtirtu an rawihna atan thla ruk chhung thla tlin Rs. 5,000 a tum tur thu a sawi.