Supreme Court thupek bawhzui dan sawiho

Ramngaw leh nungchate venhimna tura Supreme Court leh National Green Tribunal (NGT) thupêk hrang hrangte bawhzui dan tur ngaihtuahin, nimin khan Principal Chief Conservator of Forest (PCCF) conference hall-ah a kaihhnawih department hotute an ṭhukhawm.

Meeting chuan, Supreme Court thupêk bawhzuia Mizoram Pollution Control Board (MPCB)-in industry tuichhia paih chhuak chite’n tuichhe tihthianghlimna (ETP) nei ngei tur a ni tih hriatirna a chhuah tawh bawhzui dan tur an rel a; ETP nei leh nei lote zawn chhuah a, a nei lote chu khârsak tura tih a nih thu sawiin, MPCB leh Commerce & Industries department-te’n chak takin lo buaipui se, an ti.

Bethlehem Vêngthlanga thli sâwngbâwlna Sewage Treatment Plant (STP)-in a huam loh Aizawl khawpuia thlite tihthianghlim dân tur zawn ni se, an ti a; centralised leh decentralised project siam a, pâwn lam aṭanga sum hmuh dan tur zawn an rel a ni.

Industrial estate leh park-a industry awmte zir chian a, tuichhe sâwngbâwlna hmun inṭâwm tur siam dan zawn ni se, an ti a; Common Effluent Treatment Plant (CETP) leh Sewage Treatment Plant (STP) aṭanga online water quality monitoring atan ICT department lam râwn ni se, an ti.

In chhung bawlhhlawh (solid waste) enkawl chungchânga Court thuchhuak leh dante thlir a ni a, Court-in hun tiam chhûnga tih tur a tukte tihlawhtling tura thawh thuai an rel.

Solid Waste Management Rules-in a sawi angin, a kaihhnawih department hrang hrangte’n mahni tih tur ṭheuhte fel taka hlen ni se, an tih bakah, bawlhhlawh sâwngbâwlna dân chi hrang hranga mawhphurtute'n an tih tur ṭheuhte an tih zung zung theih nân MPCB-in ûm zui vat se, an ti bawk.

Meeting hi Environment, Forests & Climate Change department secretary Lal Ramthanga'n a kaihruai a; a kaihhnawih department-a secretary, commissioner leh officer pawimawhte an tel.