Nursing School tan Rs. 1,00,000 pe
Health minister Lal Thanzara chuan nimin khan Christian Hospital, Serkawna B Sanghnuna Conference Hall a hawng a; he damdawi-ina School of Nursing chuan batch 42-a graduate tharte thlahna hun a hmanpui nghal. Minister hian Christian Hospital Nursing School ṭanpui nan Rs. 1,00,000 a pe.
Lal Thanzara chuan, Christian Hospital Nursing School Graduation Day a hmanpuinaah thu sawiin, nurse zir chhuak tharte chu a lawmpui thu a sawi a; "Zoram chhung leh páwnah, India ram pawn thlengin hna in la chelh ang a, Kristian nurse in ni tih in damlo enkawlte chungah in lantir ṭhin dawn nia. In thutiam anga in thawh ngat chuan, Pathianin mal a sawm ngei ang che u," a ti.
Nurse-te chu damlo an enkawlte inpekna thûk tak leh ṭawngkam ṭhaa enkawla thlamuan ṭhin turin a fuih a; an hna tiṭhuanawp thei thil dang, ruih theih thil leh sum duhna nena inhnûk hnawk lo turin a chah.
Health Minister chuan, sorkarin a mipuite hriselna a ngai pawimawh tih sawiin, "Sorkarin mipui hriselna atan kawng hrang hrangin hma chak takin a la chho mek zel. District hospital tinte thuam ṭhat a nih thuai theih nan hmalak mek a ni a, health worker, nurse leh doctor indaih lohna phuhru turin hmalak mek a ni," a ti.