MPC-in MFPRTC hlawhtlin an beisei lo

MPC party chuan thuchhuah siamin, Selinga Mizoram Food Processing Research & Training Center (MFPRTC), cheng nuai 500 senga din a ni leh Chief Minister-in a hawng ta chu lawmawm an tih thu an tarlang a; chutih rual­in, ṭangkai taka khawl hmanna tura pawimawh ber kawlphetha a ṭhat si loh avangin a hlawhtlinna an beisei loh thu an sawi.

May 15, 2017-a MFPRTC hawnnaa CM Lal Thanhawla leh minister R Lalzirliana ten food processing-a hmalaknaah sorkar puihbawmnaa din a hlawhtlin ngai loh thu an sawi chu dik an tih thu sawiin MPC chuan, "A chhan pawh kan ramin kawlphetha chakna hmanga hmasawnna lam­tluang a zawhna tura Brig. T Sailo kaihhruai PC sorkar hmalakna Congress leh MNF ten an chhunzawm duh loh vang a ni," an ti.

MPC chuan, an party leh an thurualpuite'n Mizoram dinchhuahna atana kawlphetha thil tih theihna siam chhuak turin Mizorama lui liante an khuap dawn tih sawiin, chumi tihlawhtling tur chuan Mizoram mipuite sorkarna siampuiah an sáwm a ni.